ഒരു കൊലപാതകം

       ഞാനാരാണെന്ന് നിങ്ങൾക്കറിയാമോ? വെറുതെ ഒരു കൊലപാതകം ചെയ്യാൻ ആഗ്രഹിക്കുന്ന ആദ്യ വ്യക്തി. കുറച്ചു കാലമായി വെറുതെ ഇരിക്കുമ്പോഴൊക്കെ ആരെയെങ്കിലും കൊല്ലണം എന്നു തോന്നിപ്പോവുകയാണ്. കൂടുതൽ നേരവും വെറുതെ ഇരിക്കുന്ന കൊണ്ട് അത് മാത്രമാണ് ഇപ്പൊൾ മനസിൽ നിറഞ്ഞു നിൽക്കുന്നത്.
പക്ഷെ എന്തു ചെയ്യണമെന്നറിയില്ല. വെറും പകൽക്കിനാവുപോലെ മാത്രമായി ഒതുങ്ങിപ്പോവുന്നു. ഉറങ്ങാൻ കിടന്നാലും അവസ്‌ഥ മറ്റൊന്നല്ല. ഇതേ തുടർന്ന് ചില കൊലപാതക സ്വപ്നങ്ങളും കണ്ടു തുടങ്ങി. പല അത്യാധുനിക രീതികളും സ്വപ്നത്തിലുണ്ടായിരുന്നുവെങ്കിലും ഉറക്കമുണരുമ്പോഴേക്കും എല്ലാം വെള്ളത്തിൽ വരച്ച വരകൾ പോലെയാകും. എത്രയൊക്കെ ശ്രമിച്ചിട്ടും അതൊന്നും വീണ്ടെടുക്കാൻ സാധിച്ചതുമില്ല.

           കുറെ ദിവസങ്ങൾ ഇങ്ങനെയൊക്കെ തുടർന്നു. അങ്ങനെ ഞാനൊരു പോംവഴി കണ്ടെത്തി.നമ്മുടെ അതിയായ ആഗ്രഹങ്ങളും ചിന്തകളുമാണ് നമ്മുടെ സ്വപ്നങ്ങളായി മാറുന്നത്. ഒട്ടും ബന്ധമില്ലാത്ത സ്വപ്നങ്ങൾക്ക് ഉത്തരവാദി ഉപബോധ മനസ് മാത്രമാണ്. അതിനെ ബോധമനസിലേക്ക് എത്തിക്കുക അല്പം പ്രയാസകരവുമാണ്. എങ്കിലും ഉപബോധ ലോകവും ഭൗതിക ലോകവും തമ്മിലുള്ള പൊരുത്തങ്ങളിലൂടെ നമുക്ക് സഞ്ചരിക്കാനാകും. ഈ ബന്ധം ഊട്ടിയുറപ്പിക്കാൻ കൊലപാതക ചിന്തകളുടെ കൂടെ എഴുത്തിനെക്കുറിച്ചുള്ള ചിന്തകളും സജീവമാക്കി. അനുഭവങ്ങളാണല്ലോ കഥകളും കവിതകളും സൃഷ്ടിക്കുന്നത്. അങ്ങനെയെങ്കിൽ എന്റെ സ്വപ്നാനുഭവം ഉപബോധ മനസിന്‌ ഭൗതികമായി എഴുതാൻ സാധിച്ചേക്കും. പണ്ട് മൂത്രമൊഴിക്കാൻ കക്കൂസിൽ ഇരിക്കുന്നത് സ്വപനം കണ്ട് കിടക്ക വിരിയും ഉടുത്ത കുപ്പായവും നനച്ചിരുന്ന ബാല്യ കാലങ്ങൾ ഇത്തരത്തിലൊരു സൂചന നല്കുന്നുണ്ടല്ലോ. സാധ്യതകളുടെയും സ്വപ്നാനുഭവങ്ങളുടെയും ബലത്തിൽ ഒരു പേനയും എഴുതാനുള്ള കടലാസും തലയിണക്കരികിൽ വച്ച് കിടന്നുറങ്ങി. ദിവസങ്ങളോളമുള്ള തയ്യാറെടുപ്പുകൾക്ക് ശേഷമാണ് ഞാൻ ഈ സജ്ജീകരങ്ങൾ ഒരുക്കിയത്. ഇനി സ്വപനം കണ്ടിട്ട് കാണാം.

               ഞാൻ സ്വപ്നം കണ്ടു. ഉണർന്നപ്പോൾ എനിക്കൊന്നും ഓർമയില്ല. കൊല്ലുന്ന സ്വപ്നം കാണുന്നതിനെപ്പറ്റിയും അതെഴുതാൻ കടലാസ് വെച്ചതും ഓർമയില്ല. എഴുന്നേറ്റ് കിടക്ക മടക്കി വെച്ചു ഞാൻ താഴേക്ക് ഇറങ്ങി. അന്നേ ദിവസം ഒരു സാധാരണ ദിവസം മാത്രമായി കടന്നു പോയി. രാത്രി കിടക്കാൻ വേണ്ടി കിടക്ക മറിച്ചിട്ടപ്പോഴാണ് തലയിണക്കരികിൽ കടലാസ് കിടക്കുന്നത് കണ്ടത്. അതെടുത്തു വായിച്ച ഞാൻ ഞെട്ടി. മുകളിലെ ഖണ്ഡിക ഞാൻ സ്വപ്നത്തിൽ എഴുതിയതാണ്! ബാക്കി സ്വബോധത്തോടെയും. പക്ഷെ ഇത് വായിച്ചതോടെ ശൂന്യമായിരുന്നു എന്റെ മനസ് വീണ്ടും കൊലപാത ചിന്തകളിലേക്ക് മടങ്ങിപ്പോയി. അങ്ങനെ ഉറക്കത്തിൽ കാണുന്ന മാസ്മരിക കൊലപാതക രീതികൾ കടലാസിലാക്കാൻ കഴിയാതെ വന്നതോടെ സിനിമകളെ ആശ്രയിക്കാമെന്നു കരുതി. അതാവുമ്പോൾ എളുപ്പത്തിൽ മനസിലാക്കാനും കഴിയും. അതിനു വേണ്ടി കുറെയേറെ സൈക്കോ ക്രൈം ത്രില്ലറുകൾ കണ്ടു. അവയിൽ നിന്നുള്ള സമാന രീതികളെ ശ്രദ്ധയോടെ കൂട്ടിച്ചേർത്ത് നൂതനമായ മറ്റൊരു രീതി ഞാൻ കണ്ടെത്തി. പക്ഷെ അതൊക്കെ കഴിഞ്ഞപ്പോഴാണ് ഞാൻ ശ്രദ്ധിച്ചത്, കൊല്ലാനുള്ള ആളെ ഞാൻ കണ്ടെത്തിയിരുന്നില്ല. നിജപ്പെടുത്തിയ രീതികളൊക്കെയും ആരെയെങ്കിലും ഉന്നം വെച്ചുള്ളതാകണം, അപ്പോൾ പിന്നെ ഞാനുണ്ടാക്കിയത് ആരെയുദ്ദേശിച്ചാണ്? എന്റെ മനസിൽ ഉയർന്ന സാഹചര്യങ്ങളെ ഉദ്ധരിച്ചാണ് രീതി ചിട്ടപ്പെടുത്തിയത്, പക്ഷെ അത് ആർക്ക് ഉതകുന്നതാണെന്നു തിരിച്ചറിയാനായില്ല. അപ്പോഴാണ് യേശു ക്രിസ്തുവിന്റെ വാചകം എന്റെ ശ്രദ്ധയിൽപെട്ടത് ,” നിങ്ങളിൽ പാപികളല്ലാത്തവർ ഇവളെ കല്ലെറിയട്ടെ”. അതേ ഞാൻ പാപികളെ അന്വേഷിച്ചു, അവരെ കൊല്ലുന്നത് പാപമല്ല. എന്നിട്ടും അങ്ങനെയൊരാളെ കണ്ടെത്താൻ ഞാൻ പരാജയപ്പെട്ടു. എന്റെയുള്ളിലെ ആഗ്രഹം മൂർച്ഛിച്ച് മൂർച്ഛിച്ച് ഭ്രാന്തമായ അവസ്ഥയിൽ എത്തിച്ചേർന്നു. ഉറക്കം നഷ്ടപ്പെട്ട രാത്രികൾ കടന്നു പോയി. പക്ഷെ ചിന്തകൾ രൂക്ഷ ഗന്ധത്തോടെ പുറത്തേക്ക് വമിക്കാൻ തുടങ്ങി. അങ്ങനെയൊരു ദിവസം ഞാൻ ഉറങ്ങാൻ കിടന്നു. നിമിഷങ്ങൾക്കുള്ളിൽ ഉറക്കത്തിലേക്ക് നടന്നു കയറി. സ്വപനത്തിൽ ഞാനൊരാളെ കൊന്നു. രാത്രിയായതിനാൽ മുഖം വ്യക്തമല്ല .ഫ്ലാഷ് അടിച്ചു നോക്കിയപ്പോൾ ഒരു നടുക്കം, അത് ഞാൻ തന്നെയല്ലേ? ഞെട്ടിയുണരാൻ കിണഞ്ഞു ശ്രമിച്ചിട്ടും കണ്ണുകൾ തുറക്കപ്പെടുന്നില്ല. കൈ വിരലുകളിൽ നേരിയ ചലനമുണ്ട്. ഞാൻ എന്നെ കൊന്നത് എഴുതി ചേർത്തു. എന്റെ സാഹചര്യങ്ങളെയായിരുന്നു ഞാൻ അവലംബിച്ചത് , അതിനാൽ കൊല്ലപ്പെട്ടത് ഞാൻ തന്നെയും. എഴുതാൻ ബാക്കി വെച്ച ജീവൻ കൂടി എന്നിൽ നിന്ന് മറയുന്നു. അതെ, ഞാൻ എന്നെ കൊന്നു. ആഗ്രഹം സഫലമായിത്തീർന്നു .

....................…...................................................

                  പി.എസ്.സി ക്ക് പഠിക്കുന്ന കാലം, അടുത്തൊന്നും നല്ല പരീക്ഷകളില്ല, എഴുതിയത്തിന്റെ റിസൾട്ടും വന്നില്ല വീട്ടിൽ നിന്നാണെങ്കിൽ സമ്മർദവും. അങ്ങനെയിരിക്കെ ഞാൻ ഇങ്ങനെ എഴുതി വെച്ചു. എന്നിട്ട് ആ വിരസതയെയും പ്രതീക്ഷയില്ലായ്മയും കൊന്ന് ഞാൻ പഠിച്ചു. ഇന്ന് അതേ പി.എസ്.സി യിൽ ജോലി ചെയ്യുന്നു.

ഈ വഴി വന്നതിന് നന്ദി.ഇനിയും വരിക അഭിപ്രായങ്ങൾ രേഖപ്പെടുത്തുക.